2011 онд Зэвсэгт хүчний байнгын холбоонд шинэ техник, технологи нэвтрүүлж мэдээллийн дамжих хурдыг нэмэгдүүлэн, тасалдал саатлыг бууруулжээ. Зэвсэгт хүчний 014, 337 дугаар ангийг шилэн кабельд холбон, электрон АТС, тоон холболтын болон сүлжээний өсгөлтийн техник хэрэгслээр төхөөрөмжилжээ. Мөн барилга-инженерийн 3 ангийг хот хоорондын телефон ярианы сүлжээнд холбож, богино долгионы “Кодан” радио станцаар хангажээ. Бас БХЯ, Зэвсэгт хүчний дотуур холбоонд 1997 оноос ашиглаж байсан анологи системийн АТС-ыг ХБНГУ-ын бүрэн тоон системийн станцаар сольсон нь байнгын холбооны бэлэн байдлыг дээшлүүлэх том арга хэмжээ болжээ.

            Онцлог үүрэг зориулалт, өвөрмөц ажил албатай Зэвсэгт хүчин, ЗХЖШ-ын хувьд олон нийтийн хэвлэл, мэдээллийн хэрэгсэл (ХМХ)-тэй хэрхэн харилцаж, амжилт бүтээлээ зөвөөр сурталчлах нь чухал байдаг. Тиймээс ЗХЖШ-ын АУГ-ын Иргэн-цэргийн харилцааны хэлтсээс энэ талаарх асуудлыг зохицуулах чиглэл боловсруулж байгаа ажээ.

            “Армийн утга зохиолын нэгдэл” гэх алдар түүхтэй дугуйлан 1990-ээд оныг хүртэл оршин тогтнож байв. Энэ нэгдлийн сүүлчийн эрхлэгч нь эдүгээгийн Ерөнхийлөгч Ц.Элбэгдорж байлаа. Зэвсэгт хүчинд ажилладаг уран бүтээлч офицер, ахлагч нарыг дэмжих зорилгоор ЗХЖШ-ын Иргэн-цэргийн харилцааны хэлтэс, тус сонин хамтран “Утга зохиолын өдөрлөг”  буюу Цэргийн утга зохиолын шинэ нэгдлийн нээлтийг хийхээр төлөвлөж байна. Удахгүй болох энэ өдөрлөгт анги, салбарын яруу найрагч мөрдэстнүүд хүрэлцэн ирж найргийн дээжээ унших боломжтой. Цаашид цэргийн яруу найрагчдын бүтээлийн түүвэр хэвлүүлэх, анги, салбарт “Утга зохиолын өдөрлөг” зохиож байх, “Соёмбо” сонинд сард 1 удаа утга зохиолын нүүр гаргахаар тус нэгдлээс төлөвлөж байна.

              “Зэвсэгт хүчний байгуулалтыг 2015 он хүртэл хөгжүүлэх хөтөлбөр”-ийн хэрэгжилтийг эцэслэн дүгнэхэд 3 жил үлджээ. Энэ жил БХЯ, ЗХЖШ-аас хөтөлбөрийн хэргэжилтэд тодотгол хийнэ. Хөтөлбөрт тусгасан нэг гол заалт бол цэргийн алба хаагчдын нийгмийн асуудал, тодруулбал орон сууц. Тус хөтөлбөрт урт хугацааны зээл өгөх, газар эзэмших эрх олгох, барилгын материал хөнгөлөлттэй үнээр худалдах, байгууллагын мэдлийн орон сууц барих зэрэг аргаар 2006-2010 онд офицер, ахлагч нарын 5 хувийн орон сууцны асуудлыг шийднэ гэж тусгасан. Энэ заалт биелэлээ олсон. Харин 2011-2015 онд байнгын бүрэлдэхүүний 6.5 хувийнх нь орон сууцны асуудлыг шийдвэрлэхээр тусгасныг офицер, ахлагч нар хүлээж байна.